Cliciwch ar y dolenni isod i ddarllen ein gwybodaeth cyn gwneud cais:

• Gwybodaeth am ein ffrydiau cyllido cyfredol
• Ein polisïau a chymhwysedd o ran rhai pynciau penodol
• Y Safonau Gofynnol ar gyfer dyrannu grantiau (y mae’n rhaid i bob ymgeisydd llwyddiannus eu bodloni)
• Fideos gwybodaeth am ein strategaeth grantiau

Os oes gennych gwestiwn i ni nad yw’n cael ei ateb uchod, gallwch fynd i’n tudalen Cwestiynau Cyffredin neu gallwch gysylltu â ni.

Rhan gyntaf y broses o wneud cais yw llenwi ffurflen ‘Datganiad o Ddiddordeb’. Ffurflen fer yw hon, i chi gael dweud mwy wrthym am eich sefydliad a’r gwaith rydych am i ni ei ariannu. Os ydym am glywed mwy am y gwaith rydych yn ei wneud, byddwn yn anfon ffurflen gais lawn atoch, er mwyn i chi ei llenwi. Bwriad y Ffurflen Datganiad o Ddiddordeb yw bod yn ffordd gyflym a hawdd i chi ddweud wrthym beth yw syniad sylfaenol eich prosiect.

Bydd penderfyniadau’n seiliedig ar y gwaith rydych chi’n gobeithio ei wneud, yn ogystal â sut mae’n cyd-fynd â’n Cynlluniau Cenedlaethol a Rhanbarthol.

Os bydd eich Datganiad o Ddiddordeb yn llwyddiannus, gofynnir i chi gyflwyno ffurflen gais lawn. Yn ystod y cam ymgeisio, gofynnir i chi roi rhagor o fanylion i ni am y gwaith rydych chi’n ei wneud. Byddwn hefyd yn gofyn am ragor o fanylion am gyllid, trefniadau llywodraethu a gweithdrefnau diogelu eich sefydliad.

Ar gyfer ceisiadau o £15,000 neu lai y flwyddyn

Rydym yn anelu at wneud penderfyniadau’n gyflym ynghylch ceisiadau am £15,000 neu lai. Byddwn yn eich ffonio i wirio rhywfaint o wybodaeth am eich prosesau diogelu. Yn dibynnu ar ba mor gymhleth yw eich cais a’ch gwaith, efallai y byddwn hefyd yn gofyn i chi egluro rhywfaint o wybodaeth. Ar gyfer rhai ceisiadau cymhleth, byddwn yn cael sgwrs hirach â chi am y gwaith rydych am i ni ei ariannu.

Ar gyfer ceisiadau o £15,000 neu fwy y flwyddyn

Ar ôl i ni dderbyn eich ffurflen gais lawn, efallai y bydd angen rhagor o wybodaeth arnom am eich sefydliad neu’r gwaith rydych yn ei wneud. Efallai y byddwn yn cysylltu â chi i holi rhai cwestiynau ychwanegol dros e-bost, galwad ffôn sydyn neu alwad asesu.

Os bydd eich cais yn llwyddiannus, byddwn yn anfon Llythyr Cynnig a ‘Ffurflen Derbyn Grant’ atoch. Cyn i chi dderbyn unrhyw daliadau, bydd angen i chi lofnodi a dychwelyd y ffurflen, ynghyd â’ch manylion banc, a chytuno i’n Telerau ac Amodau.

Efallai y gofynnir i chi fodloni rhai amodau cyn i ni ryddhau eich grant. Bwriad yr amodau hyn yw sicrhau bod eich grant yn rhedeg mor llyfn â phosibl. Gallent olygu eich bod yn gorfod gwneud rhywbeth, neu ddarparu gwybodaeth ychwanegol am y canlynol:

• Eich trefniadau diogelu
• Cyllid eich sefydliad
• Eich trefniadau llywodraethu
• Neu unrhyw beth i gryfhau eich sefydliad neu brosiect

Fel un o amodau eich grant, efallai y bydd angen i chi gael sgwrs sydyn (dros y ffôn neu wyneb yn wyneb) â’ch Swyddog Grant lleol, i drafod eich grant. Unwaith y byddwn wedi derbyn yr holl wybodaeth sydd ei hangen gennych, bydd eich grant yn cael ei dalu mewn rhandaliadau yn ôl eich llythyr dyfarniad grant.

Ar ôl i chi gael eich Llythyr Cynnig, gallwch ddechrau gwneud y gwaith rydym wedi rhoi arian i chi ar ei gyfer – hyd yn oed os nad yw eich taliadau wedi cyrraedd eto. Efallai y bydd eich Swyddog Grant lleol yn cysylltu â chi i holi am eich prosiect a hyd yn oed yn dod i ymweld â’ch sefydliad.

Os nad ydych chi’n siŵr pwy yw eich Swyddog Grant, cysylltwch â ni.

Rydym yn gofyn i bawb sy’n derbyn grant gennym adrodd yn ôl i ni bob blwyddyn i ddweud wrthym sut maent wedi gwneud. Mae’r wybodaeth hon yn ein galluogi i ddeall eich grant yn well, ac yn rhoi cipolwg gwych i ni o’r gwaith anhygoel rydych chi’n ei wneud. Mae hefyd yn rhoi cyfle i chi ddweud wrthym am y gwahaniaethau cadarnhaol rydych chi wedi’u gwneud ym mywydau’r Plant a’r Bobl Ifanc rydych chi’n gweithio gyda nhw, ac anfon astudiaethau achos diddorol atom.